Совета доакъашхош Парламента арг1анара заседане повестка юкъе яхача законопроекташка хьажарах бола а т1аккха иштта республике хиннача тайп-тайпара мероприятешка законодателаш дакъа лацарах бола а хоам бир.
Цхьацца республика юрташка нах бахача меттигашка хий ца хилар хьоадир депутаташ законопроектех дар дувцача юкъе. Цу г1улакха сагота болча бахача наха ухийта хьалхара хоамаш аха даьннад парпламентарешка Пхьилекъонгий юртара, Т1ой юртара, Лакхерча Ачалкхера. Хила-м цу уж х1амаш Г1алг1ачене бахача наха шерра-шера а хулаш да. Массанена дагадоаг1а соахка аьхки хий ца тоъаш нийсдана х1ама бахьан Халкъа Гулама расширенни заседане дийца дош. Цу тайпа цхьацца (кхоачамбоацараш долча даькъ т1а бахача) наха 1аткъаш дола х1ама дагадоаллаш ба депутаташ. Йовлой Заьлмаха хьалхадаккхарца муниципальни образовани а республика Правительства а цу г1улакха бехктокхаме хила безараш дечох йолча информацега цкъара ладог1а деза аьнна соцадаьд цудухьа парламентареш.
Х1анз укх сахьата бюджета 1алашонца де лерх1ача х1амашта юкъе нах бахача 10 метте хицара уж меттигаш 1алашъяра г1улакх тоадолда аьнна оттадаьд, цу юкъе 4 город а я, 6 юрт а я. Керда хий чудулаш болх бе лерх1 Маг1албике, Назране, Пхьилекъонгий юрта, Ч1ималха, Аки-Юрта, Вежарий-Юрта – еррига а 40 км. сов хи чу лела турбаш я 1ояхка лерх1араш. Ч1оаг1ъяьча мероприяте планах шолаг1ча этапах Назране 8, Магасе 5, Пхьилекъонгий юрта 5, Нестеровске 1 артезиански скважина тоха лерх1. Цул сов цхьацца йолча республика нах бахача меттигашка керда насосни станцеш а водозабораш а е лерх1.
Йовлой Заьламхана аьлар: «Т1еххьарча хана Г1алг1айче хицара 1алашо йизза хилайтара духьа цхьацца х1амаш даьд, наха эша ма эшша хий хилайта беш дукха болх ба. Х1аьта а соахка доала хьалхале шоашка ярашта а бахача наха а регионе хинна халонаш теркал еш хила йоаг1а бехктокхаме йола ведомстваш. Ахка хьадеча хий дуккха а дукхаг1а эшалга ховш ма дий. Цудухьа х1анззе а хайча бакъаьхьа да, цу юкъе хила тарлуш йола халонаш к1езигъе де лерх1араш фуд».
Региона лоарх1аме дола кхы х1амаш а хьедеш Совета доакъашхош мехка социальни сферах, Г1алг1айчен Республике зуламаш дирах боаг1ача административни бехктокхамах, Г1алг1ачен Республика даькъ т1а корта бохабеш дола малар мелар к1езигдарах а гонахьарча 1аламах йоакхо йирах а дола вурийтта хаттар дийцар.
