Тахан Г1алг1ай мехка Къонача парламентарий дуненюкъара хьалхара саммит йолаянний болх бе. Из хьаеллара торжественни церемони Г1алг1ай Республика Халкъа Гуллама заседаний Зале хилар.
Цу юкъе дакъалоацаш бар Г1Р Правительства Председатель Гаьгенаькъан Руслан, Г1Р г1олла вола керттера федеральни инспектор Ошноков Рашид, Халкъа Гулламе йолча Къоначар Парламента Председатель, Халкъа Гуллама депутат Хамхой Батыр.
Болх д1аболабайташ дош аьннар Халкъа Гуллама Председатела Заместитель Светличный Василий вар, парламента Председатела Йовлой Заьлмаха ц1ерах саммита хьаьшашка болх ираз долаш хилба аьлар цо. Форума доакъашхошка долча ший дешаца кегийча наьха паччахьалкхен политикаца чам а хьашт а хилар т1а-т1а лоарх1амег1а хулаш доаг1алга а цига моллаг1а дер деча дола цар дакъа деза-доккха хилар а теркал даьдар Йовлой Заьлмаха. Председатель ше Санкт-Петербурге в1ашаг1кхийттача Федеральни собране чуйоаг1ача Законодателий Совете дакъалоацаш ма вий.
Къилбаседа-Кавказа федеральни округе Российски Федераце Президента полномочни представитель волча Белавенцев Олега ц1ерах Ошноков Рашида къонача парламентарешка, дер дика долаш а чаккхе дика йолаш а хилба шун болх аьлар. Кегийча наьха духьа деш-дуташ дарий хьаькъе кегий нах шоаш дакъа хилар мел лоарх1аме да а теркал дир цо.
Ала деза, Г1алг1айчен Халкъа Гулламе болх беш поалхам лакха йола, хан чу бола политикаш хинна ца 1еш, къоначар ц1ерах бараш а хилар. Царех ца1 ва-кх Хамхой Батыр а. Иштта цо а бийцар Саммита доакъашхой болх ираз долаш. «Тахан вай дер, т1ехьа т1айоаг1ча хана воашта юкъе хилаезача 1иморзала юхьигий к1ийле йилар да. Цу юхьигаш тайп-тайпара долча мехкашта юкъе а кагийчар тоабашта юкъе а дола бувзамаш ч1оаг1деча г1одергда», — аьлар цо.
Кхыча паччахьалкхений а Российски Федераце регионий а кегийча наьха структурий хьалхабарий конкурпентноспособность лакхъяра а кегийча нахаца деш-дуташ дарий керда кепаш кхоллара а декхар долаш я «Магас-2018» яха саммит. Цу юкъе дакъалаца Г1алг1ай мехка баьхка Францера, Монакора, Испанера, Македонера, Джибутера, Сальвадорера, Аквадорера, Азербайджанера, Узбекистанера, Сирий 1арбий Республикера, Молдавера, иштта тайп-тайпрарча регионашкара парламентареш ба.
Францера, Испанера, Сирера баьхкача наха Саммита доакъашхошта хьалхишка къамаьлаш даьд, шоаш мерза т1аэцарах баркал а оалаш.
Россе регионашка кегийча нахаца беча балха дикаг1ча практикашта презентацеш е а, кегийча нахаца йолча юкъарлений керда форматаш кхолла а, кхыча паччахьалкхений а россе регионий а кегийча наьха парламенташта юкъе цхьацца бувзамаш леладира хьаькъе соглашенешта кулгаш язде а лерх форуме.
Саммита болх апрел бетта 29 денга кхаччалца бергба.
