Йовлой Заьлмаха тхьамадал а деш республикански Парламента Зӏамагӏча зале чакхъяьлар Гӏалгӏай Республика Халкъа Гуллама Совета кховзткъеи шийттлагӏа заседани.
Хила езаш йолча пленарни заседане ден повесткана «Гӏалгӏай Республика паччахьалкхен меттайх» долча Гӏалгӏай Республика закона хувцамаш юкъедахьара хьакхехьа» долча Гӏалгӏай Республика закона проект юкъеяхьар дийхар дешареи, культуреи, дин организацешцарча бувзамийи хьакъехьарча комитета председатель йолча Амриева Марема. Из законопроект кийчъяьй Наьсарен муниципальни района моттигерча самоуправлене Совето «Гӏалгӏай Республика паччахьалкхен меттайх» дола Гӏалгӏай Республика закон федеральни занашца вӏашкадоаладира духьа.
Ер хьалхара дац, Парламентои муниципальни образованей представительни маьженашеи цхьана болх беш. Мунипалитеташеи Парламентои цхьана болх бу законопроекташ хьакхоллача.
«Цу тайпарча цхьана болх биро таро лу нормативни кӏийленаш тоае, Халкъа Гуллама планаш наха яхачунга хьежжа вӏаштӏехьъяха, хӏаьта региональни депутаташта цу хӏамо таро лу моттигерча депутаташца массаза а бувзам лелабе», – аьнна белгалдир Амриева Марема.
Депутаташа яхачох, регион дегӏакхувлара декхараш кхоачашдеча доккха гӏо да моттигерча самоуправлене маьженаша дакъалацар. Моттигерча ӏаьдала викалашта дикагӏа хов шоаш бахача моттигера хьалаш а кхоачамбоацараш а. Цудухьа муниципалитеташа а региональни ӏаьдало а цхьана бе беза болх – тӏаккха хургда цу белхах хайра.
Гӏалгӏай Республика Халкъа Гуллама аргӏанарча пленарни заседане ден повестка проекта юкъеяхьа лаьрхӏар республикански законий 9 проект, 31 законодательни инициатива.
