Парламента З1амигача зале д1айихьар спикера Янданаькъан Мухьмада кулгал а Г1алг1ай Республика Халкъа Гуллама Совета арг1анара кхетаче.
Цига дакъа лоацаш бар фракцей а парламентски комитетий а кулгалхой, Г1Р Мехкдаь Администрацен а прокуратура а викалаш.
Депутаташа йийцар массехк законопроект а законодательни инициатива а.
Паччахьалкхе дег1айоалаярах а законодательствах а йолча комитето хьаенна «Г1алг1ай Республика доазон т1а гулламаш, митингаш, демонстрацеш, шествеши пикетированеши яра хьакъехь» долча Г1алг1ай Республика Закона 31 статье хувцамаш юкъедахьара хьакъехьа йола а «Г1алг1ай Республика цхьайолча законодательни акташта хувцамаш юкъедахьарах йола» а законопроекташ юкъейихьай арг1анарча пленарни кхетачен повестка проекта.
Бюджетахи налогехи йолча комитета председатела Сукиев Асхьаба йовзийтар «Г1алг1ай Республика паччахьалкхен даржашка а паччахьалкхен граждански служба даржашка а болча наха ахчанца кхоачо ярах долча» Г1алг1ай Республика Закона 1 Т1атохара 4 разделе хувцамаш юкъедахьара хьакъехьа йола» законопроект.
Закона проект Г1алг1ай Республика Мехкдас хьалхатеттай, из ювзаенна я Российски Федераце Президент волчара Г1алг1ай Республика Массазарча представительства Аппарата структуре къахьегача даржашкарча наха ахчанца кхоачо ярца.
«2019 шерара республикански бюджет кхоачашдарах йолча» закона проект юкъейихьай арг1анарча пленарни кхетачен повестке, хьалхарча дешаре тохкаргйолаш.
Дагадохийт, республика законодательни органа регламентаца нийса, Халкъа Гулламе д1айихьар 2019 шерара республикански бюджет кхоачашдара хетаяь шеръяь кхетаче.
«Иштта Г1алг1ай Республике «Г1алг1ай республике промышленни къахьегамах а промышленни политиках а дола», лаьрхх1а инвестиционни контракташ кхоачашъяра даькъе» хьакъехьара Закона а Г1алг1ай Республика «Недрайх долча» Закона а хувцамаш юкъедахьарах йола законопроекташ депутаташ юкъейихьар Г1Р Халкъа Гуллама арг1анарча пленарни кхетачен повестке, шоллаг1ча дешаре тохкаргйолаш.
Депутаташа йийцар РФ Президента, РФ Федеральни Гуллама, РФ Правительства а РФ субъектий законодательни гулламий а законодательни ткъо инициатива.
Цул совг1а Янданаькъан Мухьмада амалт делар, паччахьалкхе дег1айоалаярах а законодательствах а йолча комитета председатель И. Боков керте а волаш, комисси в1ашаг1йолла аьнна, республикански законаш федеральни законашта нийса дий тахкара декхарашта.
