Наьсарерча № 4 йолча ишколерча къонача журналистий аьттув хилар Йовлой Заьлмахаца хьаккхашта къамаьл де. Уж «Къона журналист» яхача кружоке дакъалоацаш ба. Дукха ха йоаццаш цар каьхат яьздаьдар спикера цӏерагӏа цунца вӏашагӏкхета шоай безам хилар гойташ.
Парламента Председатель волча Йовлой Заьлмаха вӏаштӏехьдаьлар къонача корреспонденташца вӏашӏагкхетар духьа ший балха тӏа кӏезиг-дукха мукъа ха лаха. Цу къонача журналисташта хьалхаяьнна яр кружока кулгалхо, дукхача хана денз корреспондента болх беш хьайоагӏа Дзортанаькъан Марина.
Йовлой Заьлмаха ше дӏахьекхар берашка еррига Парламент.
Эггара хьалха къона корреспонденташ хилар спикера кабинете. Хӏаьта Тӏонганаькъан Саӏида аьттув хилар спикера кресло чу вагӏа а массехк минота цун болх бе а. Председатела пурам делар цунна селекторе гӏолла къамаьл де къонача депутатаца Хамхой Батыраца. Саӏида къамаьл а дир Батыраца, хаьтта а хаьттар цунга, мишта вӏаштӏехьдаьннад хьа ткъаь диъ шу даьлча республикански парламента депутат хила, аьнна.
Къонача журналистий аьттув хилар парламента истори довза, таханарча дийнахьа депутаташа беш болча белха эргалонаш йовза, Парламента экспозицеш бӏаргаго, фотогалереяга хьажа, республикански парламента сессеш хулача зала чу хила.
Цул тӏехьагӏа къоначар аьттув хилар Гӏалгӏай Республика Парламента председатель волча Йовлой Заьлмахага дуккха хаттараш тела. Тела хаттараш цхьаккха тайпара дийхка дацар, шоашта хьадага мел дехараш дала йиш йолаш бар уж. Берий бала боацаш нагахьа хӏама дацар: ЕГЭ оалача экзаменах фу хургда, Россе Президента хоржамех, депутатий балха тӏа нийслуча чоалханеча дешаех. Цхьан къонача журналисто хаьттар спикерга, ишколе мишта дийшад ӏа аьнна.
Парламента председатела аьлар, ше ишколе дика дийшад, массаза а активист хиннав: юкъерча классашка ишкола дружинан Совета председатель хиннав, хӏаьта лакхерча классашка вагӏача хана – комсомольски организаце секретарь хиннав.
Берашта юкъерча цхьабараша аьлар, шоай депутаташ хила безам ба, аьнна. Спикера царна ловца а баьккхар, кхоллама аьттув балба шун, аьнна, хьехар а дир дукхагӏа дешалаш, шоашта ховр дикагӏа шаьрделаш, аьнна. «Шу тха кхоане я. Шун хьинарах тийша шун кхоане хинна ӏац, цох тийша я берригача мехка кхоане а. Массаза хувцалуш долча укх дунен тӏа аьттув балара дукха хӏама ха деза, цудухьа оаш дика деша деза, оашош керда хьатӏа мел ӏомадер дика ӏомаделаш. Цхьа зама йоагӏаргья, республиканна а мехка доал оаш деш», – аьлар спикера.
Шоай професси дикагӏа караерзае а аьттув балба шун, аьлар къонача корреспонденташка Йовлой Заьлмаха. Наьха уйлаш «новкъайоахараш» журналисташ ба, цудухьа вайна без шоай болх ховш а бакълувш а бола журналисташ», – аьлар цо.
Къонача корреспондентех цхьанне, Тӏонганаькъан Хьавас дӏаелар спикерга яьзъяь запискаш чуйоахка капсула, вокхо царна чӏоагӏа баркал аьлар сел хоза ловцаш цар дахарах.
Кемерове хиннача хатара тӏагӏолла бераша дукха хаттараш тийлар берий кхерамзле ӏалашъяра хьакъехьа.
«Доккха хатар да из, – аьлар Йовлой Заьлмаха. – Боккхийбараш меттел, бераш а дайнад цига. Вай массене а дог лаз цигача байнарех, Сире а кхычахьа а байнача массарех санна. Ший бера лазар е ӏоажал бӏаргагорал халагӏа хӏама хургдац даьна-нанна. Вӏалла шеко а йоацаш вай массане а воашта могар дергда цу тайпара хӏама кхы ца хилийтар духьа».
