Парламентареша ладийгӏар Гӏалгӏай Республике предпринимателий бокъонаш лораяра хьакъехьа Уполномоченни волча Хаматхананаькъан Мурада 2017-ча шера Уполномоченне баьча балхах йолча информацега.
2017-гӏа шу пхелагӏа шу да Гӏалгӏай Республике предпринимателий бокъонаш лораяра хьакъехьа Уполномоченни болх беш вола.
Гӏалгӏай Республике предпринимателий бокъонаш лораяра хьакъехьа Уполномоченне яхачох, Уполномоченне аппарате цу юкъа хьачукхаьчай республикерча предпринимательство лелаеча субъекташкара 859 обращении жалобаши. Хьалхарча шерага хьежача уж 11 % дукхагӏа я, хӏаьта 2016-ча шера хиннараш а 33,5 % дукхагӏа яр 2015-ча шера хинначарел. Иштта 2017-ча шера хьачуеннай 203 обращени, царца 52 жалоба а йолаш (царех 81 % болчар яхар бакъ а даьд), хӏаьта 2016-ча шера – 183 обращени, царца 46 жалоба а йолаш (царех 83 % болчар яхар бакъдаьд).
Хаматхананаькъан Мурада яхачох, царех дукхагӏъяраш ӏаьдала муниципальни органий чиновникаштеи республика министерствай кулгалхоштеи йола жалобаш я. Къаьстта дукха я жалобаш Гӏалгӏай Республика юртабоахамеи кхачани Министерства кулгалхошта.
«Чоалхане дешаш нийслой а, предпринимателий ерригача обращенешка доаггӏача тайпара хьажа вӏаштӏехьдаьннад тха. 2017-ча шера кассационни инстанце дийца а дийца предприниматель бакъ а веш чакхдаьлар Уполномоченнечун викал юкъе а волаш дувцаш лаьтта дош – 2016-ча шера из дош дувцаш 13 суда заседани хиннаяр», – аьлар Хаматхананаькъан Мурада.
«Халахете а, предпринимателаш дукхагӏхулаш бац вайцига. Из дувзаденна да микро-бизнес лелаечарех дуккхабараш налогови органашка регистраци еш ца хиларца, хӏана аьлча царех дукхагӏбараш да вела пайда хьа ца боалаш къахьегаш ба. Хӏаьта а тхо беррига низ тӏа а бахийта къахьегаш да бизнес лелае мел эша хьашташ республике вӏаштӏехьдахара», – белгалдир Хамахананаькъан Мурада.
Ший доклад йистеяьлча, Гӏалгӏай Республике предпринимателий бокъонаш лораяра хьакъехьа Уполномоченне волча Хаматхананаькъан Мурада жоп делар депутатий хаттарашта.
2017-ча шера шоаш баьча балхах Гӏалгӏай Республике предпринимателий бокъонаш лораяра хьакъехьа Уполномоченне волча Хаматхананаькъан Мурада яьча докладага ла а дийгӏа, из йийца а йийца, депутаташа лаьрхӏар Гӏалгӏай Республика Правительствас а Гӏалгӏай Республике предпринимателий бокъонаш лораяра хьакъехьа Уполномоченне волча Хаматхананаькъан Мурада а вайцигара инвестиционни климат тоаяра тӏаберзабаь болх алсамбаккхара къахьега деза, хӏаьта Гӏалгӏай Республика экономически дегӏаахара Министерствас къахьега деза долгосрочни кредитни ресурсаш зӏамигача бизнеса хьатӏаозаш, аьнна.
