Гӏалгӏай Республика Халкъа Гуллама председатель, «Единая Россия» парте Гӏалгӏай региональни отделене Секретарь волча Йовлой Заьлмаха дӏадихьар цу парте председатель волча Медведев Сергея Региональни общественни приемне шоай хаттарий хьакъехьа бахархой аргӏанара тӏаэцар. Наха увттадаь хаттараш тайп-тайпара дар. Масала аьлча, Къоастой Къурейша наькъашкара кхерамзле ӏалашъяра комисси вӏашагӏйолла дехар дир. Цо белгалдир республика доазон тӏа дукха нах боабеш авареш хулаш хилар. Цо яхачох, паччахьалкхен стандартех йоаца бордюраш а йоаггӏача тайпара йоаца светофораш а я дукхагӏча даькъе уж авареш хилара бехке. Республике гӏолла мел йолча светофорех дукхагӏъяраш шоай ягар машений листалга хьежжа йолаш яц.
Коастой Къурейша граждански позици лакха хилар бахьан долаш цунна баркал аьлар парламента спикера, цу тайпара комисси йолаш йолга белгал а дир. Хӏаьта цо яха дош цу комиисе доакъашхошта хьалхашка оттадергдолга белгал а дир, хӏана аьлча цу тайпара болх бе безараш цу балхах дика кхеташ бола специалисташ ба.
Тӏой-юртара баьхкача боккхийча наха хьоахадир наха цӏенош де лаьтташ хьадекъалгеи доахан доажаде моттигаш хьакъоастаелгеи.
Республике вовзаш волча тренеро Мерешканаькъан Яхьяси, цунца баьхкача юрта активисташа К. Дугиевси М. Яндиевси шоашта хетар аьлар Орджоникидзе цӏерагӏча паччахьалкхен унитарни предприяте балхах. Цар яхачох, цу предприяте кулгалхой каст-каста хувцаш хиларо новкъарле ю болх лерттӏа дӏабахара. Дикагӏа хургдарий-хьогӏ цу предприяте кӏийлен тӏу юрта-боахама кооператив хьайича, аьлар цар. Йовлой Заьлмаха белгалдир, цу тайпара реорганизаци йилехьа из дош кӏоаргга тахка дезаш хилар. Цудухьа из дош тахка а парламента заседане дувца кийчде а дӏачуделча бакъахьа да йоаггӏача комитете, цул тӏехьагӏа предложенеш Республика Мехкадаьга дӏачулургйолаш, аьлар цо.
Иштта хьоахабир муниципальни депутатий болх а, хӏана аьлча цар дукхагӏа дакъа лаца деза юртара дешаш тохкача а, дувцача а, доашхача а.
«Дог гӏоздоаккхаш да, дуккха баха нах шоай хьашташ дагадаьхка ца ӏеш, шоай юртахорй а шоай юрт а дагайоаллаш хилар. Масала, цар уйла ю, мишта тоадергдар-хьогӏ юрта боахам дегӏаахар», – аьнна, белгалдир спикера.
