Гӏалгӏайчен Парламент вӏашагӏйоллара ди дездеш хӏара шера Хулкъа Гулламе чакхйоах Йийлача наӏарий ди яха акци.
Тахан Гӏалгӏайчен Парламент вӏашӏагӏъелла 24 шу дизар дездеш Халкъа Гулламе баьхка хилар Гӏалгӏай Политехнически колледжа студенташ.
Вай парламент йовзар студенташа дӏадоладир цу гӏишлонга гӏолла экскурси йирца. Царна хьахаваьнна гид варХалкъа Гулламерча Кагирхой совета председатель вола Хашинаькъан Закре. Из Парламента Аппарата болхло ва.
Эггара хьалха уж хьежар Парламента керттерча помещенега – Заседаней залага. Цу зала чу тӏаэц республика ӏаьдала лоархӏаме мел дола документ.
Иштта кагийча наьха аьттув хилар таханарча депутатий корпуса состав, истори, структура йовза, Парламента балха керттера лостамаш гойташ бола фотогойтам бовза, Халкъа Гуллама депутаташца къамаьл де.Парламенте ворхӏкомитет я, цу хӏара комитета болхлоша гӏозалца тӏаийцар студенташ, шоай хӏара дийнахьарча балхах дийцар. Депутата Хамхой Батыра дийцар студенташта, законопроектаца беш бола керттера болх комитеташка бу, аьнна. Парламенте хьачуенача законопроекта эггара хьалха регистраци ю, тӏаккха Председатель волча Йовлой Заьлмаха йоаггӏача комитете дӏачухьожаю из, хӏаьта, йоаггӏача тайпара кийчъяьйий а хьеже, цар из законопроект Халкъа Гуллама Совете дӏачулу.
Депутаташа дагадохийтар кагийча наха, хӏанзчул 24 шу хьалха хинналга Гӏалгӏай Мехка эггара хьалхара парламентски хоржамаш. Цу хана хьакхеллар Гӏалгӏай Республика Халкъа Гуллам. Хӏаьта укх дӏадахача Парламента болх беча 23 шера депутаташа тӏаийцад эзарнел совгӏа закон.
Студентий хьашт долаш дар дуккха дешаш – республикера экологически хьал, республика политически вахаре кагирхоша дакъалацар, къона специалисташта болх бе моттигаш тоъаш ца хилар, законаш тӏаийдара болх. Депутаташа цар мел долча хаттара жоп делар.
Депутаташа Амриева Маремеи Овшанаькъан Жансуратеи дукха ха ялалехьа хургдолча Российски Федераце Президент харжарах шоаш къамаьл деш хаьттар кагирхошка, хоржамий бокъонаш йовзаш бий уж, аьнна. Хӏаьта шоай аргӏагӏа студенташа аьлар, 18 шу мел даьнна колледжа дешархой хоржамашка дакъалаца лаьрхӏа ба аьнна.
Студенташца къамаьлаш дир, цар хаттарашта жоп а луш, къонача депутата Гадинаькъан Ислама, Белхарой Яхьяс, Тебойнаькъан Мухьмада, кхычар а.
Студенташа дег тӏара баркал аьлар депутаташта а Парламента Аппарата болхлошта, шоаш сов хоза тӏаэцарах. Цар массане а белгалдир, цу тайпарча форматех долча вӏашагӏкхетараша кагирхошта дуккха керда хӏамаш ха торо лулга а, республика Парламент вай мехкахошта йийла хилар бакъделга а.
