Йовлой Заьлмахага хьалхале а йолаш Г1алг1айчен Республика Халкъа Гуллама ткъаи ялхайттлаг1а заседани чакхъянний тахан республикански Парламента заседаний Зале.
Заседане балха дакъа лоацаш хилар Г1алг1айчен Мехка Да Евкуров Юнус-Бик, Г1Р Конституционни Суда Председатель Гаьгенаькъан Аюп, Г1Р Лакхехьарча Суда Председатель Фаргиев Ибрагим, Г1Р прокурор Васильченко Андрей, РФ ФСБ Г1Р г1олларча Управлене начальника заместитель Калашников Виталий, Г1Р сага бокъоний Уполномоченни Оздой Джабраил, Г1Р Мехка Даь Администраце Кулгалхо Янданаькъан Мухьмад, Г1Р Юкъарлен палата Председатель Дзагенаькъан Мовлат-Гири, т1аккха иштта министертвай, ведомствай, муницпальни образований болхлой.
Заседане доакъашхошта Г1алг1айчен Республика Халкъа Гуллама 2018 шера б1аьстан сессе баьча балхах йола йизза отчет йовзийтар Г1Р Халкъа Гуллама Председатела Йовлой Заьлмаха.
Къаьмал д1адоладеш чакхъяьннача сессе керт-кертера дараш белгалдир Парламента спикера. Эггара хьалха Российски Федераце Президента хоржамаш а долаш.
«Укх 2018 шерарча б1аьстан сесси йоккха а лоарх1аме а хиннача х1амашца белгала я, кхоаненга кхача дарех дола Российски Федераце Президента хоржамаш а долаш. Уж хоржамаш долаш Г1алг1айчено юха а политически культура лакха боарам а хоржамий процесс дика в1ашт1ехьаяьккхар а гойтар», — аьлар цо.
Цул сов, Россе Президента Путина Владимира Федеральни Собранега а Г1Р Мехка Дас Евкуров Юнус-Бика Г1Р Халкъа гулламага а шерра-шерра деча Кхайкаралаца увттаду керттера дараш а хьоадир спикера.
Республикански законодательство тоадеча а дикка болх баь хилар теркалдир иштта Халкъа Гуллама преседатела. Хувцамаш хьокхаденнад юкъарлен вахара масса а йолча сферах х1ана дац аьнна. Къаьстта оале, 2018 шера январь бетта денз Г1Р Халкъа Гуллама д1аехьай Г1Р ялхлаг1ча созыва Халкъа Гуллама Совета 23 заседани а Г1Р Халкъа Гуллама 9 заседани а. Цу юкъа 24 республикански закон а т1аийцад, Г1Р 516 Халкъа Гуллама Постановлени а т1аийцай.
Йовлой Заьлмаха яхачох, цу хан чу Парламента комитетий 87 заседани хиннай, б1аьннел сов хаттар а дувцаш. Халкъа Гуллама балхашцарча керт-кертера дарий хьаькъе комитетий расширенни заседанеш д1акхаьхара практика эттай Халкъа Гулламе. Цу заседанешка республика испонительни доала органий а федеральни органий даькъ т1арча доала органий а болхлой дувцар дувца а къоастадер къоастаде а в1ашт1ехьа доал. Из формат йола Халкъа Гуллама комитетий расширенни заседани 16 хиннай.
Расширенни заседанешка дийцарий темаш Дж1айрахой района даькъ т1ара историко-архитектурни памятникий йоакхо ярах дола законодательство телхадар соцадирах, федеральни собственностаца дарий хьалхаленах, г1алг1ай меттаца а литератураца а дарий кхоачамбоацарех, ВГТРК филиала «Г1алг1аче» ГТРК воахалах бола юридически хоадам бирах, ишта кхыдарий хьакъехьа дар.
Т1ах аьнна бола, цхьацца деча шоашка хьалхале йола кагийнах хьат1аоза, царна дег1ааха новкъастал де, уж нах паччахьалкхен а муниципальни а органашка беча балха юкъе оза дикка болх беш хьайоаг1а Парламент, аьнна, кертаг1адаьккхар Йовлой З. Цу тайпа бола болх гуш ба, Г1алг1айчен Республика Халкъа Гуллама Кагийча наьха парламент къала йолаллаше а, Кагийчанаьха совет хьаеш баьча Халкъа Гуллама соцамца.
Депутатски корпуса беш бола болх республике вахача х1ара а сага гургболаш я Г1алг1айчен Республика Халкъа Гуллама д1акхохьа юкъе йовкъаш йоаца видеотрансляцеш.
«Цхьа чаккхе хила езачунца уйла ме яр цхьана д1аг1ертарца мара, балхацара х1ама совдала йиш йоацалга хьахьокх практика. Цудухьа паччахьалкхен а граждански общества масса института а цхьа уйла хила еза. Т1аэца законаш оза мела дезар эза, мехка бахача наьха вахаре хиланза ца доала хувцамаш дикаг1ча оаг1ара хургхилалах тийша вола масса а депутат, цхьа уйла йолаш ва. Оаха къоастаде дезаш нийсданна х1ама балха т1ехь къоастаду. Балха т1ара хьал да Халкъа Гулламе доаллар, Парламента ше дер лертт1а де аьтув луш дола», — аьнна хоадам бир Парламента спикера.
Къамаьл дерзадеш, законадательни органа кулгалхочо законаш кхоллаш т1ата11а баьча белхах баркал аьлар депутаташта. «Шеко мичий, вай масса вар а региона экономика а социальни сфера дег1аахар а ший даха ма деззар д1адахар дезаш хилар а керда лаг1аш дахара уйла вай хилар а», — кертаг1а даьккхар Йовлой Заьлмаха
Республика Кулгалхочо парламентарешта баркал аьлар республика нармативни-правовой база дег1айоалаяра а федеральни а меттигарча а паччахьалкхен доала оаганашца лоаттабе беза бувзам а лоаттабеш депутаташ болх бира а.
«Вайна хьалха латта декхар ца1 да – е воай республика низболашаг1 халийтар, укхох Российски Федераце самодостаточни регион хьаяр, Г1алг1аче бахача наьха хьал-таро дег1аахар 1алашдир. Кхы т1ехьа т1айоаг1ача хана а республика парламент, цар хьашташ кхоашдира де мела дезар хьа а деш, харжархошта хьалхашкара шоай декхар т1ех дика кхоачашдеш хургъя, аьнна, тешшаме ала лов сона. Шоах х1аравар – къаман викал ва», — т1ато11адаь аьлар Евкуров Юнас-Бика.
Торжественни хьал оттадеча Российски Федераце а Г1алг1ачен Республика а гимний оаз сацача Парламента б1аьстанара сесси чакхъялар хьакхайкадир Халкъа Гуллама Председатела Йовлой Заьлмаха.
