Йовлой Заьлмаха председателал а деш Г1алг1айчен Республика Халкъа Гуллама ткъаь вурийттлаг1а заседани хилар.
Заседане балха дакъа лаьцар Российски Федераце Президента Къилбаседа-Кавказа федеральни округа полномочни представитела аппарата Г1алг1айчен Республика г1олла волча федеральни инспектора В.В.Смирнова, Федеральни Собране Федераце Совета доакъашхочо Б.Б. Хамчиева, Г1Р Контрольно-счетни палата Председатела М.К. Белхороева, Г1алг1айчен Республика Прокурора А.В. Васильченко, муниципальни доала маьжений викалаш.
Мехка Даь Администраце кулгалхочо Янданаькъан Мохьмада Мехка Даь ц1ерах гуйранара сесси д1айолаярца ловца баьккхар депутатски корпуса.
Цо иштта белгалдир, берригача а балха лакхара овсарле законодательни а исполнительни а доала ткъовроний нийссача наькъашца цхьатарра хьадоаг1ача федеральни доала маьженашца, муниципалитеташца, бизнесаца, юкъарчен организацешца болча бувзамий к1ийлен т1а хилар долга, керттера дар республике бахача нахаца бола бувзам д1а а хьа а болча тешамца хилар а долаш.
Цкъа дале, экономика а социальни сфера а дег1аахарах йола законопроекташ ювцар а, шозлаг1а дале, хиланза ца доалаш хулаш дола х1амаш хьалххе а довза г1ертар а дар балха юкъе массаза а хилча бакъахьа яхаш а, дийцар. Гуйранара сесси лоаца яле а, де дезарашка а де лерх1арашка а хьажача цун лоарх1ам боккха ба, цудухьа дикка низ д1ат1абахийта декхараш кхоачашде а хила дезараш хилийта а хьажа деза вай, аьлар къамаьл деш Парламента спикера Йовлой Заьлмаха.
«Лоаццача юкъа вай де дезар дукха х1ама да. Эггара хьалха — Г1алг1айчен Мехка Да харжар. Российски Федераце Президента В.В. Путина Г1алг1айчен Республика Мехка Даь г1улакхе хоржалва аьнна тайп-тайпарча партешцарча кхаь кандидатура ц1и яьккхай Мехка Гуллама хьалхашка. Уж кхоккха а кандидатура Мехка Да хила тоам болча наьха а я т1аккха сентябрь бетта 9 дийнахь вай воай хоржам а бергба», — аьлар Йовлой Заьлмаха.
Халкъа Гулламга Г1алг1ачен Мехка Дас яьча Послане д1адехар законодательни даь йистедаккхар а да иштта гуйранарча сессех де лерх1арашта юкъе.
Республикански бюджетага хьажар, цу юкъе хувцамаш дир, парламентски т1ахьожам ч1оаг1бар, законотворчества овсарле аййир – уж а да повестка лоарх1аме хаттараш.
Укх сессе керттера дарех да-м — закона оттаяьчча хана Парламенте Г1алг1айчен Республика Лаьрхх1ача медицински страховане даькът1арча фонда бюджетаца цхьана кхача дезача 2019 шерарча а 2020-2021 шерашкарча йовкъа а республикански бюджета закона проектаца болх бир да.
Гуйранарча сессех парламентареш де лерх1ар 39 республикански законопроектага хьажарре, Г1алг1айчен Республика министерствай а ведомствай а шерра-шера йолча 10 отчетага ладог1арре да.
Халкъа Гуллама пленарни заседанешка Г1алг1айчен Республика муниципальни образованей администрацеш деш-дуташ дарий хьакъе йолча муниципальни образованей кулгалхой отчеташка ладог1а а лерх1 иштта.
Цул сов, шо-шоай комитетий болх д1ахьош паччахьалкхен программашка хьажар, экспертни заключенеш кечъяр, Г1алг1айчен Республика законаш Российски Федераце хувцаданнача законодательстваца нийсдир, шо-шоай наькъашцара йола законопроекташ кечъяр мо йола 16 мероприяти чакхъяккха лерх1 депутаташ.
