Российски Федераце Федеральни Гуллама Паччахьалкхен Думан (Госдуман) фусамий политикеи фусама-коммунальни боахамеи хьакъехьарча комитете Хованская Галина председатель а йолаш тахан чакхъяьннача заседане депутаташа хьаллаьцар «Боштеи даь-наьна доал доацаш дисача бераштеи социальни гӏо-новкъостал дира хьакъехьарча сов-тӏатохача гарантех» долча Федеральни закона 8-ча статьяна хувцамаш юкъедахьарах» долча Федеральни закона проект.
Из проект кийчъяьраш Гӏалгӏай Республика Халкъа Гуллама депутаташ ба, хӏаьта Госдуме цу проекта хьакъехьа къамаьл даьр а цу проектах дар дӏадовзийтар а ва Гӏалгӏай Республика Халкъа Гуллама паччахьалкхе хьалъяреи законодательствеи хьакъехьарча комитета председатель вола Горчхананаькъан Мусса.
Цо дӏахайтар коллегашта, цу закона проекто берашта-бошта йолчарел совгӏа гарантеш ялар ӏалашделга. Цу гарантех я социальни фусамашта наем йира йола договораш оттаяра срокаш Российски Федераце субъекташка хьаялар а. Таханарча дийнахьа из срок 5 шу я, хӏаьта хӏара пхи шу массаза доала договор юхаувттаде деза. «Уж социальни фусамаш приватизаци а яь караерзае йиш йолаш яц, арендах дӏатела йиш йолаш яц, хӏана аьлча законо дийхка да уж хӏамаш. Хӏаьта уж социальни фусамаш дӏаийечарна йоккха новкъарло хул уж хӏамаш дийхка хиларах», – аьлар Муссас ше Госдума комитете къамаьл деш.
Кӏезиг-дукха из хаттар дийцачул тӏехьагӏа заседане доакъашхой раьза хилар гӏалгӏай депутаташа яхачоа, тӏаккха из проект Госдуман заседане ювцаргйолаш дӏачуяла а лаьрхӏар цар. Нагахьа санна проект чакх а яьнна закон тӏаэце, бераш-бой бокъо йолаш хургда наем йира договор тӏахьажара органашца увттаде, хӏаьта фусамашта доал дира цу берий бокъонаш дукхагӏа хургья, кхыметтел приватизаци а яь уж фусамаш караерзае йиш а хургья цар.
Белгалде доагӏа, из законопроект вӏаштӏехьъяккхар дагадехар Гӏалгӏай Республика Халкъа Гуллама Председатель вола Йовлой Заьлмах волга. Цу законопроектацара болх дӏаболабе лаьрхӏар цо Наьсарерча 18 гӏат йолаш вӏаштӏардаьча цӏагӏа дахача бой долча бераша шийга цу хьакъехьа каьхат яьздича.
Гӏалгӏай Республика Халкъа Гулламе кийчъяь ши законопроект хьаллаьцай укх шера Российски Федераце Федеральни Гуллама лохерча палате.
