Йовлой Заьлмаха д1аехьача Халкъа Гуллама Совета заседане бюджетах а налогех а йолча комитета председатела Тебой Мохьмада 2018 шерарча а планаца лоарх1ача 2019-2020 шерашкарча а республикански бюджета юкъе хувцамаш дахьарах бола хоам бир.
Депутата яхачох, федеральни бюджетера кхы а 69 миллион сом ахча дайтад унахц1енон сферашкара хьал тоадолда аьнна: молхай кхоачам бира, берий поликлиникий материально-технически хьал хьаллацара, цхьацца кхыдараш дира.
«Цунца цхьана, транспортни налога т1ара йоаг1а сбораш аййаларах а госимушества йохкарах а хулача пайданга хьажжа, республикански бюджета налоговий а налоговий доаца а доходаш юхадекъалерх1аш а да», — аьлар Тебой Мохьмада.
Иштта законопроета лерх1амашта юкъе да укх шера Г1алг1ай мехка яь яла еза берий беш а кхыйола г1ишлош а яь йистеяхар.
«Бюджета доходий дакъа 24 миллиард сом а расходий дакъа иштта 24 миллард а хургда, дефицит 300 миллионал сов а долаш. РФ Бюджетни кодексах а «Галг1ай Республика бюджетни процессах долча» законах а из иштта хила йиш йолаш да», — кертахдаьккхар докладчика.
Законопроет хьалхарча чтенех йийца чакъаяьнна а шолаг1ча чтенех ювца оттае лерх1аш а я.
