Халкъа Гулламе дукха теркам тӏабохийт гӏалгӏай мотт дегӏкхувлараи из наха юкъе боржабараи.
Йовлой Заьлмаха тхьамадал а деш, профильни комитето дуккхаза а чакхъяьхай «Гӏалгӏай мотти литературеи лорадар а дегӏакхувлар а» яхача темайна хетаяь шеръяь заседанеш. Цу заседанешка дакъалувцаш а шоашта хетар оалаш а хиннаб наха бовзаш бола ӏилманхой, йоазонхой, гӏалгӏай метта хьехархой, Гӏалгӏай Республика дешареи ӏилмани министерства викалаш, халкъа викалаш, и. кх. дӏ. а.
Халкъа Гуллама официальни сайта тӏа шоай балхах дола кердадараш гӏалгӏай меттала кепадеттара хьакъехьа къамаьл депутаташа дир февраль бутт болалуча ханна. Из дика гӏулакх (кердадараш гӏалгӏай меттала кепадеттар) эггара хьалха дагадехача Йовлой Заьлмаха декхар тӏадилар Гӏалгӏай Республика Халкъа Гуллама Аппарата, гӏалгӏай метталарча кердадарий раздел болх бе дӏайолаяра эшаш мел дар февраль бетта хьалхарча шин кӏира вӏаштӏехьдаккха, аьнна. Тӏаккха тахан, вай республике гӏалгӏай метта декада йолалуча дийнахьа Гӏалгӏай Парламенто болх бе дӏайолайолийт гӏалгӏай меттала массехк ресурс. Праламента официальни сайта тӏа гӏалгӏай меттала болх бе дӏайолалу «Хоамаш» цӏи йола кердадарий раздел. Цунца цхьана «Инстаграме» хьайийлай «halqa_gullam» яха гӏалгӏай меттала оагӏо а. Кердадараш наьна меттала деша хьашт долчун торо хургья из де: Парламента оагӏон тӏа дӏатӏа а ваьнна, метташ хувцара блока тӏа пӏелг тоӏабе мара безац – гӏалгӏай меттала кердадараш хьаовттаргда.
«Мотт бахаргхилара тешал да из мотт вай дукхагӏа лебар, цу меттах пайда вай дукхагӏа ийбар. Мотт вай лорабой, вай вӏаштӏехьдаргда воай башхал лорае, ше морг кхыйоаца вай культура лорае, истори лорае. Халахете а, вай тоъал теркам биц воай наьна метта, тӏаккха цецдувл, дуккхачарна ший къаман меттала йистхила ца харах. Из дега ӏоткъам беш, бохам баккхаш хӏама да. Сона хетаргахьа, хӏаравар декхарийла наьна мотт лорабеча дакъалаца, ший вӏаштӏехьдоалар де. Парламента балхах дола кердадараш гӏалгӏай меттала кепадеттар гӏалгӏай мотт лорабара а дегӏакхувлара а беча балхацара вай доккха доаца дакъа да», – аьнна белгалдир Йовлой Заьлмаха».
Моллагӏча ресурса лоахӏаме оагӏо я из ресурс наха эшаш хилар. Ер контент наха езаш а наьха хьашт долаш а хилара дола тешал да ер хьайийлача укх цхьан-шин сахьата укханга 300 совггӏа саг хьажар.
