Комитета расширенни заседани хилар Парламенте

Халкъа Гуллама Председатела Йовлой Заьлмаха инициативах Г1алг1айчен прокуратура, Правительства, министерствай, ведомствай викалаш а болаш республикански психолого-медико-педагогически комиссе балха хетаяь дешара а, культура а, дина организацешцарча бувзамий а комитета расширенни заседани хилар Парламенте.

Цу комиссе балхага хьажар а воалар цунах чакх мишта хала воал а теркалдар дехаш Истаграммага г1олла чолакх долча берий даьш-ноанош даь кхайкарал гучадаьннад цул хьалха.    

Цу хьаькъе масса а бехктокхаме ме вар юкъе а эза дар-доацар довза хьажа аьннад республика Мехка Дас Евкуранаькъан Юнас-Бика.

Дешара а, культура а, дина организацешцарча бувзамий а комитета председатела Амринаькъан Марема даьй-нойной инициативни группана масса а тайпа шоашта къувлачун хьаькъе, къаьстта психолого-медико-педагогически комиссе балха хьаькъе дараш а долаш, шоашта хетар ала таро йир.

Гулбаннараш массане а цхьатарра йоах, шерра-шера комиссе чакхбувлабезаро берашта а цар даьшта-ноаношта а ер йоккха хало я, х1ана аьлча ши-ше воалаш арг1ах чакхбала безараш геттара а дукха нах ба. Консультативни справка хьаэцар духьа комиссех чакхдала дезар 500 сов бер да. Цул сов, заседане квалифицированни специалисташ кечбира хьаькъе, городе Магасерча республикански реабилитационни центра балха хьаькъе, санаторни-курортни дарбана путевкай хьаькъе дараш а хьоадир заседане.    

Укх категорех долча берий хьаькъе дер деш ме йола структура сахьато мо деш хила еза, цхьан дагара. «Вай массава а цхьатарра, чолакх долча берий даьш-ноанош оалачунга цхьаккха хьем а боацаш хьожаш хила деза. Ишта а хала дукъ да царна т1ера дар. Ма хулла царна хулаш йола бюрократически духьаленаш к1езигъеш хила деза вай, царех къахеташ а цар халонаш дега гарга йолаш а», — аьлар депутата.    

ПМПК беш бола болх аттача баккхара духьа Магасе, Юкъерча Ачалкхе, Шолжа кхалий т1а даькъ т1ара комиссеш хьаеллийла аьнна баь соцам ба аьнна хоам бир гулбеннарашка Дешара Министра заместитела Угарчанаькъан П1аьтамата. Цу комиссешка болх д1аболабайта лерх1 укх шера октябрь бетта хьалхарча дийнахь.

Дувцаш дола дош ира хилар теркал деча депутаташ ц1аькха а из дувца дакха лерх1 октябрь бетта юххье.

860A1361