Гӏалгӏайчен Мехкада Евкуранаькъан Юнус-Беки Къулбаседа Кавказа федеральни округе Российски Федераце Президента йизза полномочеш йолча представителя заместитель вола Галактионов Андрейи хилар дакъалоацаш Магӏалбике берий беш хьаеллача. Лаьтташ чутекхачара ӏокӏалбайннача наха доккха совгӏат хилар цу 220 моттиг йолча, ишколе даха хайоацача берашта лаьрхӏа йолча учрежденех.
Церемоне дакъалоацаш хилар советскии российскии эстрада артист, йоазонхо-юморист Петросян Евгений, Гӏалгӏайчене гӏолла Керттера федеральни инспектор вола Ошноков Рашид, Гӏалгӏай Республика Къаман Гуллама Председатель Йовлой Заьлмах.
Берий беш я лаьтта чутекхачара нах ӏокӏалбаха аьнна Магӏалбике йисте хьалъеттача вахара комплексе. Наха баха гӏишлош хьалйотташ укхаза хьавӏашагӏъеллар еррига эшаш мел йола инфраструктура а.
«Республика дегӏаахара дуккха йола проблемаш йоашхаш оаха вӏалла а дицдалийтадац лаьтта чутекхача бахача наьха хьашташ. Эггара хьалха наха тхов-кӏийле вӏаштӏехьъяккха гӏийртад тхо. Хӏанз социальни объекташ еш доахк. Специалисташа яхачох, хьаеллаш йола берий беш укх республике дикагӏчарех йола ишколе даха хайоацача берашта лаьрхӏа учреждени я. Таханарча дийнахьа дӏадехарашка хьежжа, йизза инфраструктура я укх чу: бераш дийша дада моттигаш дика я, еррига комнаташ паргӏата я», – аьлар Мехкадас. Дӏахо цо белгалдир, укх тӏеххьарча бархӏ шера республика дешара сфере 90 объект хьалъетталга, кхаь сменах дешаш моттиг йоацилга хӏанз вайцига. «Укх шера март бутт дӏабовлехьа йистеяргья йиъ ишколи шиъ берий беши», – аьлар цо.
Къулбаседа Кавказа федеральни округе Российски Федераце Президента йизза полномочеш йола представитель волча Белавенцев Олега цӏерагӏа гулбеннараш берий беш хьаелларца даькъалбийцар Галактионов Андрейс а. Цо белгалдир, объектага 189 млн сом дӏадахалга. «Укх шера республике хьалйоттаргья кхы а 19 социальни объект. Из чӏоагӏа дика да, республика иштта дегӏаахар», – аьлар Галактионов Андрейс.
Петросян Евгенес а даькъалбийцар гулбеннараш. Цо белгалдир, бер хьадешше а долалулга гонахьара дуне ӏомаде. «Цудухьа деррига а лоархӏам болаш да», – аьлар цо. «Беро деррига хьатӏаэц зӏамига долча хана, хӏаьта из хьатӏа мел ийцар цун дега чу дуж, цун оамалаш хьакхоллача доккха дакъа а лоацаш. Хьатӏадоагӏаш да Халкъашта юкъера кхалнаьха ди, цудухьа аз даькъалбувц беррига кхалнах, къаьстта укх хозача берий беша ухаргдолча берий ноаной. Дог-дика, хьаькъал долаш, шедолчох кайоалаш хилда шун бераш», – аьнна ловца баьккхар цӏихезача артисто.
