Тахан Г1Р ХГ Председатела заместитела Кхоартой Якъуба хьалхале а лелаеш Халкъа Гуллама Замаг1ча зале д1аяхача экономически политика парламентски комитета расширенни заседане республикански хина 1алашо еча долча кхоачамбоацарех а уж д1адахара наькъех а дийцар.
Заседане балха юкъе дакъа лоацаш хилар Г1Р Правительства вице-премьер Ужахьнаькъан Дауд, «Ингушрегионводоканала» директора д. кх. Дзейтанаькъан Муслим, «Маг1албика район» МО администраце керте латта Ц1ечой Адам, Инаркъерча администраце керте латта Котанаькъан Адам.
Е в1ашаг1кхетар май бутт болабалча денз хьакъеда доладанна республика нах бахача кхаь меттиге хица нийслуш дола кхоачамбоацараш бахьан дар.
Муниципалитета керте латтарашка меттел, Халкъа Гуллама депуташка а цхьацца шоашта цу хьакъе къувлараш дувца болабаннаб юрташка баха нах. Хицара 1алашо низкъала йола г1улакх укх шера нийсданна а укх шера нийслуш а х1ама дац. Нийсдала из х1ама бахьанаш доккхий долаш нийсуш а да, керттера а водоснабжене шира система пайдана ца хиларах.
«Ингушрегионводоканал» ГУП яхачох, хица йолча 1алашон духьа деш дар чакхдаккха регионе болх беш профильни инвестиционни программа я. Цу г1улакха хьахьожадаь финансови средстваш 4 городе а 6 юрта а, еррига а нах бахача 10 метте, де дезар дира д1адахийта лерх1. Керда хий чудулаш болх бе лерх1 Маг1албике, Назране, Пхьилекъонгий юрта, Ч1ималха, Аки-Юрта, Вежарий-Юрта – еррига а 40 км. сов. Ч1оаг1ъяьча мероприятий планах шолаг1ча этапах Назране 8, Магасе 5, Пхьилекъонгий юрта 5, Нестеровске 1 артезиански скважина тоха лерх1.
Цул сов цхьацца йолча республика нах бахача меттигашка керда насосни станцеш а водозабораш а е лерх1.
Хьалхара-хьалха шо-шоай меттигашка хицарча 1алашон де дезар фуд муниципалитеташта дикаг1а ховндаь, водоснабжене системаш проектировать деча хана царна хетараш дукхаг1а теркалдолда аьнна хьалхадаьккхар депутаташ.
Этта латтар чоалхане а ира а х1ама доландаь хицарча 1алашон деш-дуташ долчунга лертт1а хьежа лерх1 Парламенте.
