Республикански бюджет кхоачашъеча юкъа тоаяр

Спикера Йовлой Заьлмаха тхьамадал а деш Республикански Парламента заседаний зала чу хилар Гӏалгӏай Республика Халкъа Гуллама аргӏанара йоаца ткъаь шийттлагӏа заседани. Заседане балха юкъе дакъалаьцар республика правительства доакъашхоша, тӏахьожама органий кулгалхоша, федеральни структурай а муниципальни образованей а цхьаболча викалаша.

 «2018-ча шерарча республикански бюджетеи 2019-чеи 2020-чеи шерашкарча планови юкъани хьакъехьарча» Гӏалгӏай Республика Закона юкъе хувцамаш дахьара хетадаь дош дар депутаташа дийцачарех керттерадар. Цу законопроектах доклад яьр бюджетеи налогийи хьакъехьарча комитета кулгалхо вола Тебонаькъан Мухьмад вар. Цо белгалдир из документ федерельни а республикански а законашца нийсдаь хилар.

Депутата белгалдир, цу ювцача проектагӏа 2018-ча шерарча бюджета дефицит хувцалуш цахилар – специалисташа яхачох, из ше хиннача тайпара 300 миллион сом хургья. Бюджета дӏадохийтача даькъа тӏа ӏотӏатехад миллиард совггӏа сом ахча. Цу ахчах цхьа дакъа дӏадахийта лерхӏ балха боацачарна медицински страховани еча, цхьаькха дакъа – ширдаьннача цӏеношкара нах кердача фусамашка баха дӏачубахийтар ӏалашдеча, наха медицински гӏо дар дикагӏа ӏалашдеча.

Цул совгӏа, цу тӏара ахча дӏахьожаде лерхӏ республика муниципальни районий бюджеташка, республика юрташкара а пхьешкара а (городашкара) наха салоӏа моттигаш тоаяра, культура учрежденеш хьаллацара.

Депутаташа хаттараш тийлар докладчика, дукхагӏча даькъе уж дар унахцӏено лораяра хьакъехьа. Депутатий керттера уйлаш йовзийташ, Парламента Председатель волча Йовлой Заьлмаха аьлар, депутатий бокъо яц вайцига чӏоагӏа лира латта унхошта молхаш ӏалашъяра гӏулакх теркам боацаш дита, аьнна.

Тебонаькъан Мухьмада хоам бир депутаташка, унахцӏено лораяра кхы тӏа ахча хьожаде лерхӏаш да, дукха ха ялалехьа цу гӏулакха ахча хьачуда дезаш а да республике, тӏаккха из дош цхьан кога тӏа доаккхаргдолаш а да, аьнна. Цул совгӏа, алапи вахара минимумал кӏезигагӏа долча бюджета болхлошта алапеш айдара лаьрхӏа 53 миллион соми берий бешамаши ишколаши хьалъяра лаьрхӏа 257 миллион соми хьахьожадаьд республика.

Депутаташа тӏаэца лаьрхӏар из законопроект.

Халкъа Гуллама депутаташа дийцар 50 гаргга дош. Царна юкъе яр республикански законий 8 проекти, цул совгӏа, Российски Федераце Президента, Российски Федераце Федеральни Собране, Российски Федераце Правительства, Российски Федераце субъекташкарча законодательни гулламий 39 законодательни инициативеи.

1342113

232111344

32421123